Ханси Флик за повратникот во првиот тим на Барса: Потребни ни се играчи како него

После 389 дена, Ансу Фати повторно е во комбинација за настап на натпревар кој го игра Барселона, па оваа вест предизвика големо внимание и меѓу шпанските новинари.

Човекот кој ја наследи легендарната „10-ка“ на Лео Меси не доживеа развој како што сите очекуваа, а после една тешка сезона мината во Брајтон на позајмица, сега дочека нова шанса во матичниот клуб.

Ханси Флик беше импресиониран од Фати на стартот на подготовките, уште на самиот почеток најави дека ќе смета на него, но за првиот натпревар мораше да почека поради повредата која ја заработи.

Офанзивниот фудбалер сега е дел од тимот и може да добие минути вечерва против Монако, но најверојатно тоа ќе го направи како резерва.

– Навистина не знам во каква улога ќе го искористиме Фати. Тој е подготвен за игра и кога го велам ова, велам дека е подготвен за 45 минути. Знам која му е омилена позиција на теренот, но ќе го оставам малку во неизвесност. Јас сум задоволен од тоа што го гледам кај него, тој ужива на тренинзите и кога имаме натпревари постојано постигнува голови. Потребни ни се играчи како него, – изјави Ханси Флик.