Ханси Флик најде една забелешка на својот тим по победата од 5:0

Барселона на најдобар можен начин одговори на поразот од Осасуна и успеа да се рехабилитира со триумф во Лигата на шампионите, и тоа со убедливо издание кое заврши со пет гола во мрежата на Јанг Бојс.

Каталонскиот гигант беше нависитна расположен за игра и успеа да постигна пет погодоци во мрежата на гостите, но се создадоа шанси за уште најмалку два или три.

Ханси Флик е навикнат да гледа како неговите тимови победуваат во високи голеади, но дури и во мирни и речиси перфектни мечеви како оној вчера, Германецот наоѓа по некоја забелешка.

Тренерот на Барса не е задоволен од начинот на кој неговите играчи влегле во мечот, па не пропушти да го потенцира тоа во прес-центарот на „Монжуик“.

– Беше важно да освоиме три бода после почетниот пораз од Монако. Победата од 5:0 е повеќе од заслужена. Не почнавме добро, но брзо сфативме дека треба да се вратиме на потребното ниво. Ја вративме самодовербата и среќни сме за победата. Ова е првиот чекор во Европа, но не застануваме тука. Следат нови предизвици, а веќе овој викенд имаме нов натпревар во Ла Лига.

– Не почнавме добро и мора натпреварите да ги почнуваме поцврсто и посилно. Мора да имаме подобра динамика и да имаме подобра пас игра на стартот на натпреварите. Се подобривме како што одминуваа минутите, но треба да се поправиме во тој аспект на следниот меч, – изјави Флик.