Халанд се приближи до историскиот рекорд на Агуеро, Гвардиола даде хит изјава за противничките дефанзивци

Ерлинг Халанд во подготвителниот период нагласи дека работи понапорно од било кога и дека подобрувал сегменти во кои смета дека треба да се подобри, а ако се суди според стартот на новата сезона во Премиер лигата, Норвежанецот навистина успеал да коригира одредени детали во својата игра.

Халанд дојде до бројка од седум постигнати гола на првите три меча во Премиер лигата, но вчера вторпат во низа испорача хет-трик и практично само го реши Вест Хем на гостувањето во Лондон.

По трите гола против Ипсвич, Халанд го повтори истото и против „чеканите“, а начинот на кој делуваше импресивно во шеснаесетникот и на останатите делови од теренот го натера Пеп Гвардиола да даде хит изјава.

– Ерлинг е несопирлив во моментов. Не постои стопер кој може да го сопре, дури ниту со пиштол. До толку е незаджрлив во овој момент и сите дефанзивци го знаат тоа. Оваа сезона ја унапреди својата игра во сите сегменти. После тренинзите работи уште дополнителни 20 минути или половина час. Минатата сезона тоа не го направи ниту еднаш. Среќни сме за него, не само поради головите, туку и поради тоа што е вклучен во играта. Не загуби ниту една топка и одигра неверојатно. Навистина не можам да бидам позадоволен од него, – изјави Гвардиола.

Со вчерашните три гола, Халанд стигна до осми хет-трик на само 69 одиграни натпревари во Премиер лигата, па сега го делат само четири од историскиот рекорд на Серхио Агуеро. Аргентинецот запиша 12 хет-трика на 275 меча, Алан Ширер забележа 11 на 441 натпревар, додека пред Халанд е и Роби Фаулер со 9 хет-трика на 379 натпревари.