Халанд промаши пенал, Сити не го победи ниту Евертон (ВИДЕО)

Манчестер Сити остана без победа во уште еден натпревар во Премиер лигата, овојпат против Евертон во мечот со кој беше отворена „боксинг деј“ програмата во најсилната англиска фудбалска конкуренција.

И покрај кризата, „граѓаните“ важеа за огромни фаворити на хартија на ова соочување, но тоа не го потврдија на теренот и на крајот мораа да се задоволат само со бод (1-1).

Избраниците на Пеп Гвардиола ја крунисаа иницијативата и во 14 минута го отворија резултатот со погодокот на искусниот Бернардо Силва. Меѓутоа Сити како по обичај во овој период потклекна при првата поголема шанса на противникот кој дојде до изедначување преку Ндиаје во 36 минута.

Со овие 1-1 се замина на пауза по која фаворитот одново се впушти во акција и во 53 минута доби удар од 11 метри по прекршкот над Савињо. Одговорноста ја презема Халанд, но неговата намера беше прочитана од голманот Пикфорд.

Потоа немаше поголеми возбудувањата, актуелниот првак немаше соодветни решенија, „карамелите“ лесно се бранеа и двете страни добија по еден бод од овој меч.

ОВДЕ можете да ги погледнете головите.