Гвардиола за рекордерот на Баерн: Не постои друг фудбалер како Милер

Пеп Гвардиола за време на тренерската кариера водеше неколку европски великани и работеше со голем број врвни играчи кои оставија или се уште оставаат длабок печат во фудбалската историја.

Во минатото Шпанецот го водеше и Баерн, а при престојот во Минхен имаше одлична можност да се увери во квалитетите на Томас Милер.

Ветеранот изминатиот викенд стигна до 710-тиот натпревар во дресот на Баварците и постави апсолутен рекорд за бројот на настапи за бундеслигашот, а Гвардиола уште еднаш не штедел комплименти за Милер.

– Не постои друг играч каков што е Милер.

– Тој е еден од најголемите фудбалери во историјата на Баерн, но и воопшто на светскиот фудбал. Не е потценет, фудбалските фанови од целиот свет знаат колку е важен на теренот, тој е мудар и непредвидлив играч кој знае како и каде треба да се движи, – рекол Гвардиола.

Менаџерот на Сити го избрал и омилениот момент од периодот кога му беше тренер на Милер.

– Губевме од Јувентус со 2:1 во 2016 година, тој постигна гол и обезбеди продолжение, а потоа победивме со 4:2. Она што најмногу ме изненади е скромноста на Томас при прославувањето на головите. Кога фудбалерите постигнуваат голови трчаат и слават самите, додека Милер едноставно веднаш се упатува кон соиграчите и сака само да ги прегрне, – рекол Гвардиола.