Гвардиола за истрагата за Сити: Среќен сум што наскоро ќе ја дознаеме одлуката

Сослушувањето и соочувањето на двете страни во случајот за 115-те прекршоци на Манчестер Сити на правилата на финанскиот фер плеј ќе започне наскоро, а Пеп Гвардиола тврди дека тоа е добра вест за сите.

Неколку години се зборува за големиот број прекршени правила од страна на англискиот шампион, но Премиер лигата најави дека наредниве месеци ќе биде спроведена целата постапка и на почетокот на следната година веројатно ќе биде позната и одлуката на независната комисија.

Менаџерот Гвардиола смета дека тоа е најдобро сценарио и посакува што побргу да се заврши овој процес.

– Среќен сум што процедурата ќе започне наскоро и ќе заврши за кратко време, тоа оди во прилог на сите.

– Добро е и за клубот, но и за останатите членови на Премиер лигата. Очекувам да бидат сослушани нашите факти, а потоа ќе ја почитуваме одлуката на оваа независна комисија.

– Не очекувам цела ситуација да влијае врз екипата, затоа што на оваа тема се зборува веќе три-четири години, – рекол Гвардиола, кој брка петта титула по ред со Сити.