Гвардиола постави прашање за Џордан и Чикаго во обид да ја оправда кризата на Манчестер Сити

Пеп Гвардиола се соочува со неазапаметена криза како фудбалски стручњак и неговиот Манчестер Сити забележа седум порази на последните десет натпревари, период кој направи многумина да ја доведуваат во прашање зависноста од еден играч во тимот.

Повредата на Родри донесе крајно негативно влијание и тимот на Гвардиола изгледа сосема загубено на теренот, но дополнителен проблем е и фактот што повреди заработија и други клучни фудбалери како Фоден, Де Брујне, но и дефанзивци кои се важни за цврстината на тимот.

Гвардиола се измори од поставени прашања за лопата игра на неговиот тим и веќе бира разноразни начини за да ја оправда кризата, а последната теза која ја понуди е поврзана со династијата на Чикаго Булс во НБА лигата.

– Играме без „Златната топка“ и без најдобриот играч во Англија од минатата сезона (Фоден). Можеби ќе се снајдете ако играте без нив на четири или пет натпревари, но ние ги немаме многу долго.

– Колку шампионски прстени ќе освоеше Чикаго без Мајкл Џордан? Тоа е прашањето кое треба да се постави. Ниту еден тим не може без најдобрите, ниту еден тим не може без своите централни дефанзивци. Ниту еден тим не може без „Златната топка“ и без најдобриот од минатата сезона, – потенцира Гвардиола.