Гвардиола по болниот пораз: Ни следат 10 финалиња до крајот на сезоната

Манчестер Сити пропушти златна шанса да избие на третото место на табелата во Премиер лигата и да го раздрма Нотингем Форест, но наместо тоа, избраниците на Пеп Гвардиола уште еднаш покажаа слабост во меч во кој се чинеше дека доминираат.

Сити беше подобар ривал во првиот дел и се чинеше дека наметнува свое темпо, па иако изгледаше дека Нотингем е тимот кој ќе биде позадоволен со почетните 0:0, на крајот „шумарите“ беа тие кои се израдуваа на три бода.

Голот на Хадсон Одои во 83-та минута се покажа како претежок удар за гостите од „Итихад“, па иако имаше десетина минути за реакција, актуелниот шампион не успеа да направи ништо посериозно.

Поразот значи дека Нотингем избега на плус четири од Манчестер Сити, со тоа што „граѓаните“ сега ќе треперат и за четвртото место.

– Ова беше тесен меч, ги контролиравме нивните транзиции многу добро, креиравме доста шанси, но тие се бранеа навистина добро. Во првото полувреме имавме добри ситуации во кои требаше повеќе да шутираме, но не бевме доволно прецизни на крајот. На крајот, загубивме една лесна топка и со една транизиција ни дадоа гол. За жал таков е фудбалот…..

– Не ни преостанува ништо друго, мора да се подготвуваме веќе за следниот предизвик. Ни следат десет финалиња до крајот на сезоната, а прво е она против Брајтон, – изјави Гвардиола.