Гвардиола: Овој тим е посебен, верувам…

Манчестер Сити е домаќин на Реал Мадрид во првата средба од плејоф рундата во Лигата на шампионите, меч закажан за утре од 21 часот на „Итихад“.

Ова е дуел на две екипи кои во текот на сезоната покажаа доста слабости, но ова е натпреварување, фаза во која се почнува од нула и за тоа е свесен Пеп Гвардиола.

-Ни недостасува постојаност оваа сезона. Останавме без многу повеќе играчи од Родри. Само тој да ни недостигаше, немаше да имаме толку проблеми. Двете екипи се мачеа со повреди, но Реал подобро се справи со нив од нас, а тоа го покажува и фактот дека се први во домашното првенство и се борат со Атлетико. На крајот на краиштата, сите знаеме дека Реал е голем натпреварувач. Многупати сме се сретнале со нив и свесни сме дека се најдобри кога работите се најтешки. За да поминеме, потребни ни се два добри натпревари. Не заслуживме директно да се пласираме во топ 16. Тоа што реваншот ќе го играме на гости е заслужено, бидејќи не одигравме добро во лигашката фаза. Но, овој тим е нешто посебно и верувам дека тоа утре ќе го покажеме, -рече Шпанецот кој запрашан за тоа које фаворит, неговиот одговор беше следен:

-Знаеме дека двомечот ќе биде тесен, неизвесен и ќе се обидеме да одиграме два добри натпревари. Дали сте фаворит или не, ништо не менува, важно е само што покажувате на теренот, -порача трофејнито стратег.