Гвардиола: Ова ќе биде лоша сезона за нас

Пеп Гвардиола никогаш во кариерата нема претрпено пет порази во низа, но за се има првпат и тоа му се случи на последните пет меча како предводник на англискиот шампион.

Манчестер Сити ја има најголемата криза во ерата на Гвардиола и во такви услови ќе го пречека Феенорд во Лигата на шампионите, по што ќе следи големото дерби со Ливерпул на крајот на оваа недела.

Шпанскиот стручњак направи своја најава за утрешниот меч против Феенорд на „Итихад“, но за време на истата, им одговараше на новинарите кои почнаа да заклучуваат дека неговите играчи стануваат се постари, а воедно и немаат доволно голема амбиција откако освоија се што може да се освои.

– Лесно е да се каже тоа после пет порази во низа. За мене најлесно би било да кажам дека играчите немаат амбиција, но сметам дека тоа не е нашиот проблем. Мора да останеме релаксирани, ладно да правиме анализи и да не паничиме. После толку многу работи остварени заедно, нормално е да дојдеме во ваква фаза. После толку многу победи кои секогаш ги броевме, знавме дека ќе дојдат и поразите. Сега е обратно, после толку порази, ќе стигнат и победите.

– Ни недостасуваат многу играчи, очекувам само побрзо да се опорават и да бидеме покомплетни. Може да покриете едно или две отсустува, но нас нас ни недостасуваат премногу клучни играчи. И покрај се, верувам дека ни е потребна само една победа за да ја прекинеме оваа лоша серија. Потребно е да победиме и да продолжиме да го правиме тоа што го правевме. Оваа лоша серија ќе прекине многу брзо, сигурен сум во тоа.

– Со оглед на стандардите кои ги поставивме низ годините, ова ќе биде лоша сезона за нас. Дојдовме од највисокото место, па затоа сега се прават лоши споредби и кога сме втори на табелата. Тоа значи дека сме правеле многу добри работи, но во фудбалот не се живее од минатото. Потребно е да останеме мирни и да веруваме во себе. Овие играчи беа добри пред пет месеци, ништо не е променето кај нив, – изјави Гвардиола.