Гвардиола откри кој ќе биде следниот предизвик по крајот на приказната со Сити

Пеп Гвардиола од 2016 година е на кормилото на премиерлигашот Манчестер Сити со кого неодамна потпиша нов договор според кој ќе треба да остане на „Итихад“ најмалку до 2027 година.

Дали Шпанецот навистина ќе остане во Сити уште две сезони останува да видиме затоа што во фудбалот работите се менуваат, а клубот од Манчестер е пред сериозни предизвици, резултатската криза низ која минува периодов, а тука е и одлуката која ќе биде донесана за обвинувањата за прекршување на финансискиот фер плеј, поточно казната која може да биде голема за „граѓаните“.

Гвардиола во повеќе наврати има порачано дека нема да го остави клубот, па дури и да биде испратен во понизок ранг. Какви потези би се повлекле при евентуална драстична санкција на Сити ќе покаже времето, но она што е јасно е дека Пеп нема да остане во клупскиот фудбал откако ќе ја заврши актуелнава приказна.

-Нема да водам друг клуб по Сити. Не зборувам за долгорочна иднина, но она што нема да го направам е да заминам, да одам во друга земја, да го правам истото како сега. Можеби репрезентација, но тоа е поинаку, -обелоденил трофејниот стратег.