Гвардиола образложи зошто го врати Гундоган: Знам дека не е тинејџер, но…

Пеп Гвардиола обично не им дава втора шанса на фудбалерите со кои се разделува во еден клуб, но ова лето направи исклучок и со раширени раце го пречека својот поранешен капитен.

Една година по заминувањето од најдобриот тим во историјата на Манчестер Сити, Илкај Гундоган реши да се врати во „старото јато“, со што реши доста брзо да ја заврши својата кратка и возбудлива етапа во Барселона.

Лошата финансиска ситуација на клубот го принуди Гундоган да си бара решенија на трансфер пазарот, а прв клуб кој му подаде рака беше токму Сити.

Гундоган при пристигнувањето во Манчестер не го криеше воодушевувањето за новата соработка која ќе ја има со Пеп Гвардиола, но задоволен е и шпанскиот стручњак.

– Враќањето на Гундо е привилегија за нас, тоа е чест за сите во клубот. Имам кажано повеќе пати, клубот е многу добро воден од и јас и играчите имаме се што е потребно да се насочиме само на нашата работа. Илкај имаше неверојатни зборови за своето искуство во Барселона, кажа само добри работи и мислам дека имаше одлична сезона. Знаеме колку е компетитивен, а јас обожавам таков вид на играчи за врска. Секогаш сум бил заљубен во неговите квалитети, тој може да покрие две или три позиции во средниот ред.

– Го познаваме многу добро, играше на високо нив во Барселона и таму одигра многу натпревари. Беше добар и на Европското првенство и немавме дилеми дали треба да го вратиме. Пресреќни сме што се враќа, тоа беше лесна одлука. Знаеме дека веќе не е тинејџер, но решивме да го вратиме бидејќи имаше многу добра сезона, заклучно со Европското првенство во Германија. Нема да му биде потребно време да се адаптира, тој веќе знае како функционираме како клуб и како тим, – изјави Гвардиола.