Гвардиола најави промена поради невообичаената казна за Сити од Премиер лигата

Манчестер Сити изминатава недела доби седумцифрена казна поради несекојдневна причина, но менаџерот Пеп Гвардиола прифатил дел од одговорноста и најавил дека ќе мора да ја менува својата „тактика“ во новата сезона.

Премиер лигата објави дека шампионот Сити ќе плати казна поголема од 2 милиони фунти откако дваесетина пати последните две сезони бил причина за доцнење на почетокот на натпреварите, односно почетокот на второто полувреме на дел од нив.

Сити ја прифати одговорноста и најави дека ќе се обиде да избегне вакви „престапи“ во новата сезона, а Гвардиола очекувано добил прашање на оваа тема на последната прес-конференција.

– Ја прочитав веста, ќе мора да ги скратам моите говори на полувреме во новата сезона, – рекол Гвардиола.

Меѓу 22 натпревари на кои Премиер лигата забележала доцнење на фудбалерите на Сити е и дуелот со Вест Хем, на кој екипата на Гвардиола задоцнила речиси три минути на почетокот на вториот дел.

Сити на американската турнеја вечерва се соочува со премиерлигашкиот ривал Челси во Охајо.