Гвардиола брутален по елиминацијата: Не сакам да губам енергија на ова натпреварување

Манчестер Сити доживеа експресна елиминација во Карабао Купот и остана без шанса да се бори за овој трофеј, но ако се суди според изјавата на Пеп Гвардиола, тоа е она што можеби и го посакувал шпанскиот стручњак.

Менаџерот на Сити очигледно нема добро мислење за второто Куп натпреварување во Англија, па тоа можеше да се намириса и од стартната постава која ја извади на „Ст. Џејмс парк“.

Гвардиола одмори најдобар дел од стартерите во последно време и не му даде ниту една минута на Ерлинг Халанд, а по поразот од 1:0 и елиминацијата од Њукасл, беше доста брутален и искрен.

– Се одлучив за ваква стартна постава поради тоа што секогаш во ова натпреварување им давам шанса на оние кои не играат често. Ако поминеме, поминеме, ако не, тоа е тоа.

– Не сакам да губам енергија на ова натпреварување толку рано, за жал веќе имаме многу повредени играчи и не сакав да загубам уште некој. Жалам што морав да го играм и Аканџи, бидејќи идејата ми беше да го одморам. Никогаш не го бркав овој трофеј и не размислував за квартет-титули. Задоволни сме што минатата сезона ја освоивме триплетата, – изјави Гвардиола.