Гути „намирисал“ страв во погледот на Мбапе: Во моментите пред да го изведе пеналот….

Килијан Мбапе добива нова серија критики откако не реализираше пенал во поразот кој го претрпе Реал Мадрид на „Енфилд Роуд“, епилог кој диркетно влијаеше и врз конечниот резултат на натпреварот со оглед на тоа што промашувањето беше при минимално водство на Ливерпул.

Англискиот тим на крајот победи со 2:0 и остана перфектен во Лигата на шампиони, додека Реал после третиот пораз од стартот на сезоната е на 24-то место и допрва ќе треба да избори пласман во баражот.

Актуелниот европски и шпански шампион не изгледа уверливо и доминантно како што беше случај пред една година, а голем товар дефинитивно има Мбапе кој како најскапо и најголемо летно засилување засега има проблеми да се истакне како расен голгетер.

Легендарниот Гути вели дека видел проблем во очите на Мбапе уште пред да го изведе пеналот, бидејќи како што вели тој, во неговиот поглед видел страв.

– Очигледно е дека Мбапе не е на нивото кое го бара Реал Мадрид и тоа е реалноста во овој момент. Досега имаше два тешки испити, Барселона и Ливерпул, но и на двата потфрли. Сите сакаме да знаеме што се случува со Мбапе, но ако се извлекуваат заклучоци, може да се каже дека нема самодоверба.

– Во моментите пред да го изведе пеналот, видов немир и страв во неговите очи. Во такви ситуации, работите стануваат уште покомплицирани. Сигурен сум дека и тој не е задоволен од своите изданија и перформансите кои ги нуди. Мбапе излезе од комфор зоната во ПСЖ, а во Реал е уште поголем притисокот бидејќи сите го чекаа со нетрпение. Сега се натпреварува со големи ѕвезди за да биде најдобар во тимот, но истовремено, дресот на Реал има посебна тежина.

– И покрај се, сметам дека треба да бидеме трпеливи. Најлошо од се би било да биде седнат на клупата за резерви. Знам дека тоа нема да се случи, Килијан ја има поддршката од Перез и од Анчелоти, знам дека тие ќе го заштитат во овие моменти. Лесно е да се критикува, но и покрај се, Мбапе е еден од најдобрите во светот, – завршува Гути.