Гундоган го лоцираше проблемот на Сити во оваа сезона: На многу натпревари…

Манчестер Сити има сезона далеку под очекувањата, сезона која може да заврши без трофеј, но и без место во Лигата на шампионите во натпреварувачката 2025/2026.

Останува уште многу малку до крајот и „граѓаните“ ќе се соочат со важни предизвици во кои единствена цел е да се победи, а со тоа да се отвори патот и да се дојде барем до некоја основна, минимална цел. Имено Сити може да заврши во Топ 5 во ПЛ и да триумфира во ФА Купот што би било најдобро сценарио за нив, сценарио кои дефинитивно го посакуваат на „Итихад“.

Меѓутоа на подолги стази мора нешто да се промени и тоа го знае искусниот Илкај Гундоган кој анализирајќи ја тековнава кампања, падот на екипата посочи дека недостатокот на желба, агресивност и одлучност кај играчите се причината за тоа што им се случува во оваа година.

-Чувствувам дека на многу натпревари од наша страна можеби понекогаш им дававме преголемо значење на тактиката и навистина не обрнувавме многу внимание на однесувањето, нашето однесување. Да се има одлучност, желба, агресивност. Како едноставни работи кои се дел од играта, но можеби понекогаш едноставно размислувате премногу за да се позиционирате или што и да е. Може да заборавите работи што се некако нормални или што барем треба да бидат нормални, -вели Гундоган за „ЕСПН“ кој го посочи натпреварот против Борнмут во ФА Купот за тоа во кој правец треба да се движат како екипа.