Гундоган дал објаснување пред Чави и соиграчите за „Ел Класико“ изјавата, Деко ја потврди информацијата

Каталонски „Спорт“ денеска ексклузивно откри дека Илкај Гундоган имал краток говор пред своите соиграчи по враќањето од Париз, откако неговата изјава по „Ел Класико“ донесе бура од реакции во јавноста.

Неговата порака беше протолкувана како сериозна забелешка до фудбалерите кои според него не биле доволно лути и бесни после еден болен дерби пораз, но „Спорт“ денеска откри дека тензијата била смирена, такашто Гундоган побарал збор од Чави пред сите во првиот тим.

Германскиот репрезентативец објасни дека не мислел ништо лошо и дека тоа што го кажал било резултат на големата фрустрација, а неговиот говор завршил со „расчистени сметки“ и смирување на ситуацијата која доби и голема популарност во јавноста.

Деко како спортски директор на Барселона оваа вечер ја потврди ексклузивата на „Спорт“, и преку своето обраќање образложи дека тој случај е веќе архивиран и сите заедно продолжуваат напред.

– Гундоган самиот ги среди работите и тоа е веќе завршено. Има внатрешни работи кои се решаваат во тимот и сега се е мирно меѓу фудбалерите, – изјави Деко.