Гризман: Имам друг приоритет, но во Саудиска Арабија ќе си ги обезбедите децата и внуците

Антоан Гризман како член на француската фудбалска репрезентација ќе биде дел од натпреварот против Германија кој е закажан за утре, а како играч кој одби неколку понуди ова лето, се огласи за трендот број еден во Европа кога се трансферите во прашање.

Французинот излезе со свој став за големиот број европски ѕвезди кои заминаа во Саудиска Арабија, кој сепак е доста поинаков од оној кој го замислуваат најголем дел од фудбалските фанови.

Гризман ги оправдува сите големи играчи кои ги избраа астрономските плати пред фудбалскиот проект, но засега се уште се држи до својот став и вели дека негова следна дестинација ќе биде Америка и МЛС лигата.

– Ги сфаќам сите оние кои отидоа да играат во Саудиска Арабија. Зборуваме за неверојатни суми на пари. Иако ние фудбалерите заработуваме доволно добро, со Саудиска Арабија ќе си ги обезбедите децата и внуците.

– За мене тоа е нормално. Дали би одел и јас таму? Имам семејство и три деца, не би била лесна одлука. Сепак, се уште стојам до мојот приоритет, МЛС лигата и Америка е мојата цел во иднина, – открива Гризман.