Грем Сунес издвои еден фудбалер на Ливерпул: Ќе биде витален за клубот

Поранешниот фудбалер и менаџер на Ливерпул, Грем Сунес издвои еден играч на сегашниот тим како фудбалер кој ќе игра клучна улога во иднина.

Сунес беше импресиониран од тоа што го видел од Куртис Џонс на натпреварот против Шефилд Јунајтед во кој младиот фудбалер го постигна првиот погодок при победата од 2:0.

Во изјава од студиото на „Скај Спортс“, Сунес посочи дека Џонс има завидно ниво на техника и дека тоа е играч кој ќе игра значајна улога во тимот во годините што претстојат.

– Кога го гледате како игра сфаќате дека тој има огромно познавање на играта и има неверојатна техника. Тој може да дрибла на мал простор. Има само 20 години, има шанса да биде вистински фудбалер за овој клуб. Фактот што е „скаузер“ е вистински бонус. Тој ќе игра клучна улога во Ливерпул во иднина, -изјави Сунес.

Победата на „Брамал Лејн“ против последнопласираниот Шефилд Јунајтед го доближи Ливерпул на два бода од четвртопласираниот Вест Хем во борбата за излез во Лигата на шампионите.