Голема трагедија: Српски претставник се удави за време на кросфит натпревар во Тексас

Кросфит заедницата е потресена од големата трагедија која се случила вчера на специфичните Кросфит игри, кои се одржуваат во Тексас, Соединетите Американски Држави.

Животот го загуби српскиот атлета Лазар Ѓукиќ, кој не успеал да доплива до целта на пливачката делница, а потоа неговото тело е пронајдено од страна на нуркачите.

Вчера бил првиот натпреварувачки ден на игрите на кои настапуваат фитнес ентузијасти и професионалци, а по трчањето на 3,5 милји (5,6 километри) следувала пливачка делница од 800 метри во езерото Марин Крик во близина на градот Форт Ворт.

Ѓукиќ потонал во близина на целта и никој не забележал дека му е потребна помош, но организаторите тврдат дека имале добро разработен сигурносен план и се работи за несреќа бидејќи никој не можел да му помогне на српскиот претставник.

Србинот е поранешен ватерполист кој од 2021 година почнал да се натпреварува и на Кросфит игрите, а организаторите на истите најавија дека нема да го прекинат натпреварувањето и истото ќе продолжи во чест на Ѓукиќ. Веднаш е започната акција и собирање средства за семејството на настраданиот и веќе се собрани над 210.000 долари.