Голема борба во „Борис Трајковски“: Одбојкарите ја добија драмата со Хрватска за второ славје во Златната лига

Македонската одбојкарска репрезентација славеше над Хрватска со 3-2 во сетови во рамките на третото коло во Златната европска лига.

Голема драма, борба, надмудрување, неизвесност, тензија донесе вечерашниот меч во СЦ „Борис Трајковски“, меч во кој избраниците на Миленкоски сепак го имаа последниот збор и ја довршија задачата со оглед на тоа што водеа со 2-0 во сетови.

Популарните „спартанци“ одиграа два сигурни сета (25-17, 25-22) по која се стекнавме со убава предност, но Хрватите не се предадоа, одговорија на предизвикот и со 25-22 и 31-29 се изборија за петта решавачка рунда.

Во истата ние го контролиравме резултатот, противникот даваше отпор, меѓутоа водени од публиката нашите одбојкари успеаа да го докрајчат противникот со 16-14 за второ славје во ова натпреварување.

Со 5 бода сме на второто место во групата, следниот дуел ние на гостински терен на 10 јуни против Белгија, селекција која во Скопје ја добивме со 3-1.

Претходно пак македонските одбојкарки го претрпеа третиот пораз во Сребрената лига и тоа од Естонија со 3-0 во сетови со 25-10, 25-14 и 25-20.