Голем успех за ПСС Рејсинг: Џиролами на подиум на ТЦР трката во Словачка

ПСС Рејсинг стигна до место на победничкиот подиум на трката од ТЦР Европа, откако Франко Џиролами го освои третото место на втората трка од првиот натпреварувачки викенд во Словачка.

Откако вчера Џиролами и Виктор Давидовски освоија бодови на првата трка, правилата за стартување според резултатот од квалификациите му овозможи на Аргентинецот да стартува од четвртото место на втората трка, а тој тоа го искористи за прв пиедестал во новата сезона.

Трката започна со безбедносно возило уште по првиот круг, а Џиролами во продолжение постојано успешно ја бранеше третата позиција и не дозволи некој од конкурентите да го остави без заслужениот успех на патеката во Словачка.

На вчерашната трка Џиролами беше удрен во првиот круг и му беше оштетенa Хондата, па подоцна мораше да се задоволи со 12. позиција, додека Давидовски беше веднаш зад него на 13. место.

Давидовски го освои 18. место на денешната трка и останува на 5 поени, додека Џиролами има 42 по првите две трки во ТЦР Европа.

На денешната трка победи Меди Бенани со Хјундаи Елантра Н, пред вчерашниот победник, Микел Аскона со Cupra Leon P.