Голем ремонт во српската кошарка: Пешиќ ги „спакува куферите“, испрати јасна порака до идната управа

Србија покажа фантастична кошарка на Олимписките игри во Париз и го освои бронзениот медал, но после овој голем успех и одличната тимска хемија во репрезентацијата, никој не очекуваше корените промени како овие што настанаа кај нашиот сосед.

Најпрво оставка најави претседателот на кошаркарскиот сојуз Предраг Даниловиќ, но сега стана јасно дека новото раководство кое допрва ќе биде избрано, ќе мора да бара и нов тренер.

Прва задача на новите луѓе ќе биде да најдат замена за легендарниот Светислав Пешиќ, кој денеска официјално потврди дека става крај на својот втор мандат како селектор на „орлите“.

– Претседателот на кошаркарскиот сојуз, господинот Предраг Даниловиќ си поднесе оставка. Како што разбрав јас, го направил тоа за да му овозможи на новото раководство да отпочне нов олимписки циклус и да се формира нов стручен штаб. Што се однесува лично до мене, јас уште пред игрите во Париз најавив дека друг треба да го продолжи тоа што јас го започнав.

– Бидејќи гледам дека некои не ме слушнаа добро, сега им порачувам јавно. Одговорните луѓе кои во иднина ќе го водат кошаркарскиот сојуз, треба да знаат дека измеѓу другото ќе треба да бараат и нов тренер. Јас секогаш ќе стојам на располагање на српската кошарка, но ќе се свртам на некои други цели и проекти за кои немав доволно време во изминатите три години. Бев 24 часа дневно посветен на националниот тим, – изјави популарниот Кари.

Во својот втор мандат, Пешиќ го освои бронзениот медал во Париз, а една година претходно освои и сребро на Светското првенство.