Глејзерови го користат првиот човек на ПСЖ во обидот да изнудат повеќе пари за продажбата на Јунајтед

Продажбата на Манчестер Јунајтед и натаму е долга и мачна процедура за фановите, додека Глејзерови како сопственици очигледно се обидуваат да извлечат што повеќе од заинтересираните страни.

Фамилијата која управува со премиерлигашот посакува 6 милијарди фунти за продажба на клубот, додека петтата и последна понуда на Шеикот Јасим од Катар изнесувала 5 милијарди фунти.

Во обид да го убедат единствениот ривал на Џим Ретклиф во овој процес да понуди повеќе пари, Глејзерови досега неколку пати биле во комуникација со првиот човек на ПСЖ, Насер Ал Келаифи.

Еден од најмоќните луѓе на светската фудбалска сцена требало да го убеди Шеикот Јасим да понуди поголема сума, со што на крајот би станал и нов, целосен сопственик на клубот.

Ал Келаифи има добри конекции со најмоќните луѓе во својата татковина и делува како „олеснувач“ во преговорите, по што на крајот може да биде „виновник“ за пронајдениот компромис меѓу двете страни.

Голем дел од фановите посакуваат ваков епилог, бидејќи катарскиот шеик вети чистење на целосниот долг на клубот, реновирање на стадионот и тренинг центарот, како и инвестиции во составот на Јунајтед.

Она што е негативно во понудата на милијардерот Ретклиф е што тој сака да остави 20 проценти од акциите на Глејзерови, а самото нивно присуство во раководните органи е нешто што фановите на Јунајтед веќе не можат да го толерираат.