Ѓоровиќ се надева на „подобро утре“: Никогаш повеќе нема да бидеме „топовско месо“ за противниците

Женската кошаркарска репрезентација на Македонија загуби од Германија, но како на овој натпревар така и на дуелот со Хрватска покажа далеку повисоко ниво на кошарка, подобар квалитет и беше рамноправна со ривалите на „балонот“ во Рига.

Селекторот Владимир Ѓоровиќ се надева дека ова е најава за „подобро утре“, дека никогаш повеќе нема да бидеме топовско месо за противниците.

-Пораз како пораз, нормално, никој не сака да губи. Но за нас ова е пораз кој не боли, затоа што со ова е потврдена онаа добра игра против Хрватска. Тоа е нешто што најмногу ме радува. Сакам да кажам дека одамна не сме одиграле два врзани, вака ‘тврди’ натпревари. Натпревари по кои искрекно се надевам дека ќе го промениме тоа што го имаме во главите. И дека никогаш повеќе нема да бидеме топовско месо за противниците, туку ќе бидеме вистинска конкуренција за нив, -рече Ѓоровиќ кој воедно направи и прва анализа за пресметката со Германија.

-Со стручниот тим направивме анализа на екипата на Германија. И видовме дека нивниот тренер кој сега е главен ‘коуч’  на екипата на Минесота во WNBA лигата, има воиграна екипа, која је доста дисциплинирана. Пробавме константно да го притискаме нивниот плеј, за на тој начин да можеме да ја ‘расипеме’ нивната организација во нападот, и колку-толку да ја анулираме нивната игра на ‘низок пост’. Видовте и самите, немавме ни сила, ни ротација да парираме до самиот крај. Но бевме во игра 36-37 минути

-Митрашиновиќ одигра маестрално. Голема благодарност до неа, играше со повреден зглоб. Бонер е светска класа, уште подобар човек. Го даде својот максимум, овој пат и повеќе во одбраната. Трајчевска прикажа доста сериозна, и квалитетна игра. Кметовска и Николиќ го оставија срцето на теренот во борба со германските горостаси. Но, следува посебна пофалба на Пејковска и за Адамовска кои сите минути ги одиграа во пресинг на нивниот плеј Бронхорст, и се подредија на колективот. За останатите девојки има уште време, иднината е пред нив, -истакна Ѓоровиќ.