Ѓорѓев стрелаше за потврда на победата на Арау

Македонскиот фудбалски интернационалец, Никола Ѓорѓев имаше значајна улога во победата на Арау над Ксамакс во втората швајцарска лига.

Иако домаќините поведоа уште на самиот старт, гостите се консолидираа и веќе во првиот дел преку Фазлиу израмнија на 1-1. Во второто полувреме Арау направи комплетен пресврт и во 69 минута дојде до водство од 2-1, но неколку минути подоцна Коиде заработи втор жолт картон.

Ова не беше добра вест за тимот на нашиот Никола, ама токму Македонецот во 79 минута се најде на вистинското место и стрелаше за плус два и потврда на трите бода.

За него ова беше трет сезонски гол, а има забележано и четири асистенции. Арау со 29 бода е на третата позиција на табелата.