Ѓорческа запрена во полуфиналето во Куршумлијска Бања

Лина Ѓорческа играше три сета во полуфиналето на турнирот во Куршумлијска Бања, но не успеа да избори ново финале во својата кариера.

Македонската тенисерка имаше одличен настап на силниот турнир со награден фонд од 60.000 долари, но денеска е запрена од српската ривалка Лола Радивојевиќ со резултат 2:1.

Радивојевиќ го доби првиот сет во тај-брејк, Ѓорческа возврати со 6:3 и најави дека е подготвена за пресврт, но сепак немаше сили за третиот сет во кој не успеа да освои ниту еден гејм и мораше да и честита на противничката.

Предност за Србинката беше и фактот што вчера го доби четвртфиналето против сонародничката Нина Стојановиќ без борба, па поодморена влезе во полуфиналето со Ѓорческа.