Ѓорческа запрена во двете конкуренции на турнирот во Словенија

Македонската тенисерка, Лина Ѓорческа претрпе два порази и со тоа го заврши настапот на турнирот во Оточец (Словенија).

Ѓорческа прво имаше настап во поединечна конкуренција каде се соочи со првата носителка Ирина Марија Бара, меч кој го загуби со 2-0 во сетови со 7-5 и 6-0. Само првиот сет донесе вистинска борба, додека во вториот видовме доминација на Романката која го потврди пласманот во полуфиналето.

По краткиот одмор Лина имаше обврска и во двојки каде заедно со Деа Херџелаш посакуваа пласман во финалето, ама на нивниот пат застанаа вторите носителки, Марина Дражиќ и Емили Вебли-Смит.

Час и половина траеше надмудрувањето на теренот број четири каде Дражиќ и Вебли-Смит беа подобри во третиот сет со 10-6 и со тоа си овозможија меч за титулата на фјучерсот вреден 40.000 долари.

Фаворитките тргнаа со 6-3, Лина и Деа одговорија на сличен начин (6-4), меѓутоа македонско-босанската комбинација немаше сила да го комплетира пресвртот.