Ѓорческа со фантастичен пресврт до четвртфиналето на силен турнир во Италија

Лина Ѓорческа ја запиша и втората победа на силниот фјучерс турнир во Италија, откако денеска успеа да се избори за фантастичен пресврт и да слави со 2:1 над Британката Армани Бенкс.

Најдобрата македонска тенисерка вчер абеше подобра од Кристина Новак во два сета, но денеска мораше да прави пресврт за да се најде во четвртфиналето.

Тенисерката од Тетово беше предизвикана откако го загуби првиот сет со 5:7, по што следеше посигурна и поуверлива игра за 6:3 и 6:2 во наредните два сета.

Ѓорческа го комплетираше пресвртот противр подоброрангирана тенисерка која влезе како осми фаворит на турнирот во Селва Гардена, а во четвртфиналето ќе игра против Тајра Катерина Грент.

Американката денеска режираше огромно изненадување, бидејќи како 916-та на ВТА листата ја изненади првата фаворитка во Италија, Катинка Вон Дајхман.

Турнирот во Селва Гардена е со награден фонд од 40 илјади американски долари, а се игра на тврда подлога во затворени услови (сала).