Ѓорческа го предаде финалето против Викмајер

Македонската тенисерка, Лина Ѓорческа не успеа на соодветен начин да ја комплетира оваа успешна седмица на фјучерсот во Талин каде мораше да го предаде финалето со Јанина Викмајер.

Ѓорческа се обиде да игра на овој меч и покрај очигледниот проблем кој постоеше ако се земе предвид резултатот во првиот сет од 6-1 за Белгијката. Потоа беше побаран медицински тајм-аут, Лина одигра уште два гејма кои ги загуби по што реши да се повлече.

Тетовката играше фантастично во Естонија и навистина е голема штета што мораше вака да го заврши турнирот кој се играше на тврда подлога за вредност од 40.000 американски долари.

Кога е во прашање денешната ривалка на Македоната вреди да се напомене дека Викмајер е тенисерка со сериозни резултати, во минатото играше и во полуфиналето на Ју-Ес Опен (2009), а најдобриот пласман и е 12 место на ВТА листата.