Ѓорческа елиминира силна противничка за осминафинале во Марибор

Лина Ѓорческа оствари победа во два сета против подобро рангираната Петра Марчинко и избори пласман во осминафиналето на фјучрс турнирот во Марибор.

Македонката се соочи со Марчинко во битката за следна фаза на турнирот кој се игра на словенечко тло, а успеа да ги добие двата сета со 6:4 за сигурни и заслужени 2:0.

Првиот сет започна со доминација на Ѓорческа која направи два брејка и поведе со 3:0, но дозволи Марчинко да возврати на идентичен начин и да го врати сетот во егал. Сепак, Лина веднаш се исправи и третиот брејк беше клучен за 6:4 и почетна предност.

Во вториот сет, целосно спротивно, имаше само еден брејк и тоа уште во првиот гејм кој и припадна на Лина, па таа предност успеа да ја задржи до крајот на мечот.

Пред Ѓорческа е уште еден голем предизвик во осминафиналето, каде ќе се сретне со четвртата носителка, Французинката Џесика Понше, која е 153-та тенисерка на ВТА ранкингот.

Ѓорческа паралелно игра и дубл на турнирот со награден фонд од 75.000 долари и таму веќе има обезбедено место во четвртфиналето.