Ѓоковиќ со тениска лекција за грчкиот ривал во Белград

Грчкиот тенисер Јоанис Ксилас долго ќе го памети денешниот настап во „Пионир“ во Белград, бидејќи за ривал го имаше Новак Ѓоковиќ и тоа пред полните трибини на белградската сала.

Ѓоковиќ рутински и експресно го доби мечот во Дејвис куп пресметката меѓу Србија и Грција, останувајќи на теренот само 37 минути и губејќи само еден гејм.

Ксилас не освои ниту еден гејм во првиот сет (6:0), а во вториот барем избегна најлошо сценарио и со еден брејк стигна до конечни 6:0/6:1 и очекуван пораз во дуелот со грен-слем рекордерот.

Србите по првиот натпреварувачки ден водат со 2:о во дуелот со Грција, а утре најпрвин ќе се игра дубл, во кој повторно е најавен настап на Ѓоковиќ, иако капитените имаат право да направат промена до утрешниот термин.