Ѓоковиќ си постави јасни цели за новата 2025 година

Новак Ѓоковиќ ја отвори новата 2025-та година со пораз во игра на двојки во партнерство со Ник Кирјос, но Србинот останува во игра на турнирот во Бризбејн кога е во прашање ждребот во сингл конкуренција.

Ноле ја мина првата пречка на самиот крај на 2024-та година и лесно го совлада Хиџиката со 2:0, а сега во пресрет на новиот дуел со добро познатиот ривал Гаел Монфис, Ѓоковиќ ги отвори картите и посочи кои ќе му бидат главните цели во новата година.

И покрај тоа што има 37 години, Србинот не планира да застане и целта му е да се подобрува од ден во ден, па поради тоа во својот стручен штаб го придодаде и Енди Мари.

– Мојата цел е да го подобрам секој удар барем малку. Ова го мислам и за оние удари кои изгледаат совршено, оние кои ми носат извонреден процент на професионално ниво. Нема да ја менувам мојата игра во целост во новата година, но ќе се обидам да ја доработам и да ја поправам колку е тоа возможно.

– Знам дека има луѓе кои сметаат дека тоа не е непоходно, но јас ќе работам на позиционирањето, на играта во транзиција, на тактиката. Ќе се обидам да напредувам и физички и психолошки колку е тоа возможно во оваа фаза од кариерата.

– Без разлика на тоа колку ќе ме чини, сакам да бидам подготвен за натпреварување на највисоко ниво. Кога ќе заврши турнирот во Бризбејн, заедно со моите тренери ќе ја анализирам играта на најголемите ривали на Аустралијан Опен. Сакам да видам како мојата игра се вклопува со онаа на најдобрите во овој момент. Ќе видиме што правам добро, а каде можам да напредувам, – изјави Ѓоковиќ.