Ѓоковиќ пред 10 години сакал да ја заврши кариерата: Плачев, се гледав црно…

Новак Ѓоковиќ веќе долго време е на врвот на светскиот тенис, меѓутоа секој пат до врвот не е лесен и за тоа најдобро говори српскиот ас кој обелодени дека пред 10 години сакал да и стави крај на кариерата.

На Ѓоковиќ многу тешко му паднал поразот од Јирген Мелцер во четвртфиналето на Ролан Гарос, меч во кој водеше со 2-0 во сетови, но потоа „застана“ и му дозволи на Австриецот да направи комплетен пресврт.

-Во 2010 година загубив од Мелцер во четвртфиналето на Ролан Гарос. Плачев откако бев елиминиран. Тоа беше лош момент, сакав да се откажам од тенисот, се гледав црно. Тоа беше трансформација, затоа што после тоа се ослободив, -истакна Новак за „Скај Спортс Италија“.

-Јас ја освоив Австралија во 2008 година, бев број три, ама не бев среќен. Знаев дека можам повеќе, ама губев важни мечеви против Федерер и Надал. Од тој момент се ослободив, почнав да играм агресивно. Тоа беше пресвртна точка, -додаде Србинот кој сега има 17 грен слем титули зад своето име.