Ѓоковиќ откри како успеал да го „разбие“ непобедливиот Медведев во финалето во Мелбурн

Финалето на Австралија Опен кое се одигра во неделата ги разочара неутралните фанови на тенисот, бидејќи светскиот рекет број еден не му даде никаква шанса на разиграниот Данил Медвед и со максимални 3:0 стигна до деветта титула во Мелбурн парк.

Рускиот тенисер влезе со серија од 20 последователни победи на завршниот меч против Новак Ѓоковиќ, но во големото финале во ниту еден момент не му се закани посериозно на најголемиот шампион во историјата на Австралија Опен, кој со вчерашниот триумф стигна и до 18-та титула на грен слем турнирите.

Новак позираше со трофејот и на плажата во Мелбурн, а на тамошните медиуми им обелодени како успеал да го „разбие“ Русинот кој делуваше непогрешливо во својот пат до финалето.

– Голема предност во мојата игра е тоа што знам добро да се адаптирам на противникот и да се прилагодам на условите. Фактот што имам разновидна игра, што можам да применам различни стилови на игра, тоа многу ми помогна во овој дуел. Противникот не знаеше што да очекува.

– Мислам дека тоа беше клучно, Данил беше во неверојатна форма и со своите сервиси лесно ги освојуваше своите гејмови, па јас знаев што ќе биде најважен сегмент. Мојот ритерн беше најважен, влегував добро во неговиот сервис, не му давав шанса лесно да ги освојува гејмовите. Австралија секогаш го вади најдоброто од мене, се надевам дека тоа ќе го пренесам и на другите грен слем турнири, – изјави Новак.