Ѓоковиќ го прекина летниот одмор за да биде дел од денешниот спектакл во Белград

Најголем дел од српските спортисти веќе се во Белград и се подготвуваат за пречекот кој ќе го добијат пред народното Собрание, но како што стојат работиле, составен дел од спектаклот ќе биде и најголемиот спортски амбасадор на Србија.

Новак Ѓоковиќ првпат стана олимписки шампион пред една недела и се упати на заслужен летен одмор во Црна Гора и Хрватска, но сега го прекинува истиот за да биде дел од вечерашниот спектакл.

Како што јавуваат најугледните српски медиуми, Ноле со приватен лет ќе пристигне во Белград во 19:30 часот, што значи дека ќе стигне навреме за стартот на спортската фешта.

Заедничката прослава на сите српски олимпијци е закажана за 20:00 часот, настан на кој на сите српки фанови ќе им бидат покажани освоените медали во Париз.

Планирано е да има обраќање и на самите спортисти, а за очекување е најголеми ѕвезди на прославата да бидат токму Ноле, но и кошаркарите и ватерполистите кои остварија големи успеси.