Ѓоковиќ ги израдува своите фанови, па порача: Со победата над Алкарас во Мелбурн докажав едно нешто

Новак Ѓоковиќ поради мускулна повреда мораше да го предаде полуфиналето на Аустралијан Опен и се доби впечаток дека станува збор за посериозен проблем, но Србинот сега ги смири своите фанови и најави дека многу брзо се враќа на тениската сцена.

Во ексклузивното интервју за црногорски „Вијести“, Ноле порача дека ќе го гледаме на терените веќе наредната седмица на турнирот во Доха, сето тоа откако извонредно брзо го санирал проблемот со повредата.

– Немам повеќе руптура на мускулот, повредата е речиси целосно санирана и подготвен сум за нови походи во тенисот. Имам зелено светло од медицинскиот тим за тренинзи и се подготвувам за тоа што следи. Турнирот во Доха е на распоред следната недела и планирам да се држам до распоредот. Фала му на Бога, брзо успеав да се опоравам од проблемот со мускулот, – открива Ноле, кој додава дека следен атак му е 100-та АТП титула, како и 25 грен слем трофеј.

– Се надевам дека 100-от трофеј може да дојде уште во Доха. Веќе долго време ја бркам 100-та, но кога-тогаш, на крајот ќе дојде. Поголем предизвик е титула на грен слем турнир, тоа е потежок потфат во оваа фаза од кариерата.

– Сепак, ако не верував, немаше воопшто да се натпреварувам. Со изданието во Австралија докажав дека можам против најдобрите во светот. Со победата над Алкарас во Мелбурн докажав дека можам да се натпреварувам за најважните трофеи и оваа сезона, – потенцира Србинот.