Гигс објасни зошто Фергусон морал да го продаде Бекам

Сер Алекс Фергусон е менаџер кој остави голема трага во Манчестер Јунајтед, неговото име секогаш со големи букви ќе остане запаметено, запишано во историјата на „Олд Трафорд“ и во срцата на верните навивачи.

Популарниот Ферги донесе многу успеси во Јунајтед, а една од причините за тоа дефинитивно беа неговите одлуки тимот секогаш да биде на прво место. Стариот лисец знаеше многу често да се ослободи и од значајни имиња, ѕвезди кога ќе почувствуваше дека е време, односно дека го постигнале врвот, а таков беше случајот со Дејвид Бекам.

Бекам беше дете на Јунајтед, но Фергусон во 2003 година одлучи да стави крај на приказната и да го испрати во Реал Мадрид за сума од 25 милиони фунти. За тој потег тогаш имаше реакции од јавноста, ама истиот морал да се случи, а тоа го потврдува и Рајан Гигс.

-Мислам дека Фергусон во најголемиот дел се ослободуваше од играчите поради фудбалски причини. Со Бекам имаше расправии секоја недела и навистина беше време двете страни да се разделат, тоа се случуваше во неколку наврати, -истакна Гигс кој воедно откри дека и тој размислувал да си замине од Јунајтед во сезоната 2003/2004 кога не ја започнал кампањата на посакуваното ниво.