Германскиот селектор незадоволен од ИХФ: Французите имаа повеќе време за одмор

Германија вчера долго и парираше на Франција во четвртфиналето на Светското првенство, но на крајот доживеа убедлив пораз.

Избраниците на Алфред Гисласон одлично го почнаа мечот и беа рамноправен противник до последните десет минути, кога Французите успеаја да направат голема разлика.

Гисласон по мечот се пожалил на начинот на организација од страна на ИХФ.

– Му честитам на противникот, но мора да кажам дека распоредот на турнирот многу ми пречи.

– Голема е разликата дали имате еден или два дена одмор пред ваков натпревар. Тоа има влијание на исходот. Некои репрезентации мора повеќе да патуваат и немаат адекватни услови да се подготват, Франција имаше повеќе време за одмор и подготовки, – истакнал германскиот селектор.

Германците играа ден подоцна од Франција, по што патуваа од Катовице во Гдањск.