Германски судија елиминиран од Евролигата поради бизарна причина

Германскиот кошаркарски судија Бенџамин Барт одреден период не е делегиран на натпревари во Евролигата поради навистина невообичаена причина.

Раководството на најелитното клупско натпреварување го отстранило Барт од списокот поради тоа што судијата одбил да ја избричи брадата.

– Ричард Стоукс (прв човек на судиската комисија на Евролигата) ми напиша дека тренерите и спортските директори не сакаат бради и ќе протестираат поради мојот имиџ, – вели Барт, кој како доказ ја има комуникацијата со Стоукс, а по истата веќе не добил повик за судење во лигата.

– Не разбирам каква разлика прави брадата, ова е класична дискриминација. Колку и да сакам да судам во Евролигата, не можам да прифатам вакви уцени, – потенцира Германецот кој вели дека решил да ја сподели информацијата со медиумите за да спречи вакви потези во иднина.

43-годишниот Барт е искусен судија со над 500 натпревари од Бундеслигата зад себе.