Германците останаа со 14 ракометари и еден голман за дербито со Полска

Германија и Полска во меѓусебен дуел ќе решаваат за првото место во групата на Европското ракометно првенство, а германскиот состав заработи уште еден удар од ковид пандемијата.

Неколку часа пред почетокот на средбата, голманот Тил Климпке и Марсел Шилер имале позитивни тестови, па селекторот Алфред Гисласен останува само со 14 играчи за денешниот дуел.

Вчера, шест германски репрезентативци беа позитивни и веќе се во изолација, меѓу нив беа и Андреас Волф и Каи Хафнер, додека од претходно правото на настап од истата причина го загуби и Јулиус Кун.

Гисласен остана со еден голман и тоа 39-годишниот Јоханес Битер, кој допатува дополнително во Братислава, а на сличен начин беа повикани и Дамке, Фирнхабер, Друкс и Вајде.

Натпреварот Германија-Полска денеска се игра од 18 часот, а ќе го суди македонската двојка Начевски-Николов.