Гасперини: Аталанта фаворит против Реал? Не треба да се заразиме од убавите зборови

Џан Пјеро Гасперини вторпат во неколку месеци ќе подготвува натпревар против Реал Мадрид, бидејќи после поразот во финалето на европскиот Суперкуп во Варшава, Аталанта сега доби шанса за реванш на домашен терен.

Лидерот во Серија А игра во неверојатна форма и врза девет победи во низа во сите натпреварувања, па затоа со максимална доверба го пречекува Реал на домашен терен, и во ситуација кога на „кралевите“ им гори под нозе.

Тимот на Карло Анчелоти е 24-ти на табелата во Лигата на шампиони и мора да брка победа во Бергамо, без оглед на тоа што за многумина Аталанта е фаворит во овој дуел поради формата, но и поради повредените играчи во тимот на Карло Анчелоти.

– Аталанта фаворит против Реал Мадрид? Мислам дека ниту еден тим во светот не е фаворит против Реал. Ние само знаеме дека ова е супер важен натпревар за нас, ќе играме на домашен терен против најпрестижниот и најтрофејниот тим во светот. Коментарите кои доаѓаат отстрана не треба да влијаат врз нас.

– Не треба да се заразиме од позитивните и убавите коментари за нашата игра, не смееме да заборавиме дека Реал Мадрид е многу добар тим. Да се каже дека ние сме подобри од нив, тоа е класично преминување на границата на нормалното. Не сакаме да навлегуваме во такви игри, – изјави Гасперини.