Галатасарај сака да ја доведе и ѕвездата на Јунајтед

Галатасарај успешно ја заврши операцијата за доведување на Виктор Осимен од Наполи, играч кој актуелнава сезона ќе ја мина на позајмица во Истанбул.

Откако тој трансфер е комплетиран, турскиот првак има нова цел, а тоа е ангажманот на ѕвездата на Манчестер Јунајтед, Касемиро. Галатасарај разгледува опции како може да дојде до искусниот играч за врска кој претрпе многу критики за настапот на дербито со Ливерпул каде беше заменет по првото полувреме.

Јунајтед веќе го доведе Мануел Угарте и кога тој ќе биде подготвен прашање е каква улога ќе има Касемиро и токму ова може да му ги отвори вратите на турскиот великан да дојде до потписот на трофејниот играч.

Играчот за врска има огромна плата, плата која Галата не може да си ја дозволи и Јунајтед ќе треба да помогне, да плати дел од истата ако дојде до трансфер, позајмица.

Трансфер пазарот во Турција е отворен до 13 септември што значи има доволно време за активности и реализација на зделката.