Галас му пресуди на летното засилување: Не смее да остане во Челси

Вилијам Галас е легендарен француски фудбалер кој своевремено ги носеше дресовите на двата великани од Лондон, односно најпрво настапуваше за Челси пред да ја облече униформата и на Арсенал.

По пет години во Челси и четири во Арсенал, Галас на крајот играше и за Тотенхем со што предизвика и фудбалски земјотрес во Северен Лондон, но како фудбалер кој може да се пофали со големо премиерлигашко искуство, си даде за право да коментира одредени случувања од вчерашното дерби.

Арсенал го победи Челси на домашен терен со минимални 1:0 и во позитивна атмосфера замина на репрезентативна пауза, а од се видено на дербито, Галас посебно се фокусираше на Џејдон Санчо, фудбалерот кој посебно разочарува во вториот дел од сезоната.

– Џејдон има голем талент, сите го знаеме тоа, но едноставно не може да дава перформанси какви што очекувате на секој меч. Во Дортмунд беше извонреден, а во Манчестер Јунајтед работите не функционираа за него. Тој пристигна во Челси изминатово лето и на почетокот го гледавме Санчо од Дортмунд.

– Сепак, како што одминуваа месеците, така тој исчезнуваше. Едноставно не постои на теренот, не знам кој е проблемот со него. Од тоа што го гледам, тој не смее да остане во Челси, мора да нуди многу повеќе од тоа што го нуди. Кога играте во Премиер лигата, мора да давате перформанси од коло во коло. Не може да бидете добар само неколку кола, а потоа да ве нема нигде,- потенцира Галас.