Галагер си постави прва голема цел како играч на Атлетико

Конор Галагер вчеравечер беше претставен на „Метрополитано“ во групна презентација на новите летни засилувања, но еден ден подоцна, Англичанецот го одработи и првото опширно интервју за клупската телевизија.

Галагер треба да биде огромно засилување за средниот ред на Диего Симеоне и со својот труд сигурно брзо ќе го освои аргентинскиот стручњак, кој инаку беше човекот кој сериозно инсистираше на купување на играчот од Челси од стартот на летниот преоден рок.

Чоло на крајот го доби тоа што го сакаше и ќе има повеќе опции во средината, а Галагер е свесен дека од него ќе се бара многу уште од самиот старт, особено поради стандардите кои ги наметна клубот во последните години.

Конор вели дека дошол во Атлетико за да се бори против најсилните клубови во Ла Лига, а како главна цел си ја постави титулата во домашното првенство.

– Сакам да му помогнам на клубот на теренот и надвор од него. Јасно е зошто дојдов тука, целта е да се освои титулата во Ла Лига. Секако, тука се и другите титули. Дојдов да освојувам трофеи во Атлетико, ова е многу голем клуб кој освои многу во последно време. Се надевам дека и јас ќе искусам такво нешто за време на мојот престој тука, – вели Галагер.