Галагер: Јасно е кој е најважен за мојот трансфер во Атлетико

Конор Галагер пред две вечери беше дел од групата фудбалери на Атлетико кои заедно беа претставени пред навивачите на „Метрополитано“, но ова попладне Англичанецот ја дочека и својата индивидуална презентација на стадионот во шпанската престолнина.

Англискиот репрезентативец ја одработи првата прес-конференција пред шпанските новинари и ги истакна амбициите кои ги има како нов член на Атлетико, меѓутоа говореше и за важноста на Диего Симеоне во донесувањето на тешката одлука.

Галагер после 18 години го напушти Челси и зад себе остави една долга и незаборавна етапа, но сега вели дека е максимално насочен да му се оддолжи на човекот кој направи се за да го види во своите редови.

Конор призна дека Чоло Симеоне одиграл клучна улога во трансферот, по што решил без размислување да му се приклучи на амбициозниот проект.

– Симеоне одигра клучна улога во мојата одлука да пристигнам во Атлетико. Ова е еден од најдобрите клубови во светот, Симеоне е еден од најдобрите тренери во светот и едвај чекам да му се оддолжам. Имам голем мотив да играм за него, начинот на кој го поставува тимот прилега на мојот стил на игра, – изјави Галагер.