Фудбалер на Торино е позитивен на коронавирусот

Фудбалските клубови во Италија почнаа да ги тестираат своите фудбалери, подготвувајќи ги за почетокот на тренинзите и продолжувањето на сезоната, а веќе се појави и првиот позитивен тест во оваа фаза.

Торино денеска објави дека член на првиот тим имал позитивен тест и веднаш е испратен во карантин, а неговото име барем засега не е познато.

– По првичните медицински испитувања, еден од нашите фудбалери е позитивен на коронавирусот. Фудбалерот во моментов нема симптоми, ќе биде испратен во карантин и следен од нашиот медицински тим, – вели Торино во своето соопштение.

Клубовите кои сакаат да ја продолжат сезоната ќе мора да следат одреден протокол поврзан со евентуални позитивни тестови, нешто од што најмногу се плашат клубовите бидејќи може да донесе до крај на сезоната.

Според актуелниот протокол, ако еден фудбалер е позитивен, во карантин треба да одат сите негови соиграчи и тоа 14 дена, но италијанската федерација се обидува да го преземе протоколот од Бундеслигата, каде карантинот важи само за заразениот играч.