Фудбалер на Барселона: Ова не е нормално

Барселона вчера ја победи Осасуна во заостанат натпревар од Ла Лига, а терминот за одигрување на средбата и натаму предизвикува многу контроверзи во Шпанија.

Голем дел од фудбалерите имаа обврски кон своите репрезентации пред само неколку дена, а сега мораа да им се вратат на клупските обврски, по што Дани Олмо заработи и повреда уште во првото полувреме.

Неговиот соиграч Жил Кунде по натпреварот зборувал јасно и гласно на оваа тема.

– Ова не е нормално.

– Постојано зборуваме дека играме многу натпревари, а сега во една недела моравме да одиграме дури три.

– Ова е непочитување кон двата клуба, Осасуна исто така има репрезентативци како Будимир, против кого играв два пати во неколку дена. Ова е непочитување без разлика за кој клуб се работи, еднаш мора да разберат дека ние не сме роботи. Потребен ни е одмор за да го испорачаме она што го очекуваат фановите, не може некој само да си закаже термин и ние да мора да настапуваме, време е да го слушнат гласот на фудбалерите, – рекол Кунде.