Фриц му се закани на Синер: Ќе излезам на терен и ќе го победам

Тејлор Фриц ја доби битката со сонародникот Френсис Тијафо (3:2) и обезбеди место во големото финале на Ју-Ес Опен каде за ривал ќе го има првиот светски рекет Јаник Синер.

Италијанецот дефинитивно ќе го има статусот на фаворит, ама Фриц не се плаши, пука од самодоверба и порача дека ќе истрча на теренот со една цел, да победи и го освои првиот грен слем во кариерата.

-Отсекогаш сум играл добро против Јаник. Мислам дека е 1-1. Не сме играле долго време, а последен пат ме победи во три сета во Индијан Велс. Тој ја удира топката многу силно, но мислам дека секогаш добро ја удирав топката по неговите удари. Не знам што да ви кажам, обично играм добро против него.

-Искрено, секогаш уживав да играм против него. Мислам дека ќе има многу повеќе стресни ситуации од денес. Денеска се чувствував добро. Имам чувство дека ќе излезам на терен, ќе играм многу добро и ќе победам. Кога играм добар тенис, мислам дека тоа е доволно ниво за победа, -порача Фриц кој сака да стане прв Американец со грен слем пехар по Енди Родик во 2003 година.