(ФОТОГАЛЕРИЈА) Емотивниот дочек на светскиот вицешампион Стојаноски

На светскиот собир на најдобрите пливачи со оштетен слух тој со резултат од 16 минути и 57.32 секунди беше второпласиран, а пливаше уште во три финални трки на 200 и 400 метри слободно (седмо и осмо место), како и на 400 метри делфин (петти). Дочекот во Скопје беше искрен и од срце, организиран од пливачкиот клуб „Бета“ и неговите клупски другари и нивните родители, поради што изобилуваше со многу изблици на емоции, кои ја засенија потребата од скапа сценографија. Стојаноски и неговиот тренер Мане Соколовски беа дочекани пред базенот „Борис Трајковски“ со овации и солзи од родителите и најблиските, кои можат да се гордеат на успехот. На собирот присуствуваше и директорот на агенцијата за млади и спорт, Марјан Спасески, кој најави и официјален прием за „сребреното“ момче.